Tababare Arsene Wenger Oo Sheegay In Alexis Sanchez Uu Fursad U Haysto In Uu Taam U Noqdo Kulanka Muhiimka Ah Ee Ay Gunners La Ciyaari Doonto Kooxda Manchester City
Tababaraha kooxda Arsenal ee Arsene Wenger ayaa kadib guushii ay Arsenal ka soo gaadhay kooxda Aston Villa sheegay in xidigiisa Alexis Sanchez uu fursad u haysto in uu taam u noqon karo kulanka muhiimka ah ee ay Arsenal la ciyaari doonto kooxda Manchester City.
Sanchez ayaa dhaawac ku maqnaa tan iyo dhamaadkii Novermber kadib markii uu dhaawac muruqa ahi ka soo gaadhay kulankii ay Gunners barbaraha la soo gashay kooxda Norwich City, laakiin Sanchez oo daawayn ku soo qaatay dalkiisa hooyo ee Chile ayaa dib ugu soo laabtay London, wuxuuna rajaynayaan in uu taam u noqon doono kulanka 21-ka December dhex mari doona kooxaha Arsenal iyo Manchester City.
Wenger oo ka hadlayay fursada uu Sanchez u haysto kulanka Manchester City ee todobaadka danbe ayaa yidhi: “Waxaan filayaa waxa ugu dhaw ee fursada Sanchez in ay tahay Sanchez laftiisa, laakiin caafimaad ahaan dadkaygu waxay filayaan in aanu Sanchez diyaar noqon doonin, laakiin Sanchez waa Sanchez, waligaana ma ogid”.
Wenger oo hadalkiisa sii wata ayaa yidhi: “Kulanka City waa kulan wayn, waxaanu doonaynaa in City ku garaacno garoonkayaga, hadda laga bilaabo waxaanu haysanaa sideed maalmood oo aanu ku soo kabsano iskuna diyaarino, waxa uu noqon doonaa mid xiiso badan”.
No comments:
Post a Comment