Liverpool Oo Anfield Barbaro Xili Danbe Ah Kula Gashay Kooxda West Brom, Lovern Oo Dhaawac Ciyaarta Looga Dhex Qaaday,Goolhaye Mignolet Oo Qaab Ciyaareed Liita Soo Badhigay Iyo Divock Origi Oo Reds Dhibic U Badbaadiyay

Waxaa  Qoray: c/laahi mohamed geedi

Liverpool ayaa kooxda West Brom barbaro 2:2 ah kula gashay Afield kulan ay Reds gool ku hormartay balse laba gool loogu sarifay basle Divock Origi ayaa dhamaadkii ciyaarta kooxdiisa ka badbaadiyay guuldaro kale oo Anfield ku soo gaadhi lahayd wuuxuna sidoo kale kooxda klopp uu siiyay dhibic ay u dhawayd in ay ka samirto. Gool uu Henderson Liverpool hogaanka ugu dhiibay ayay  Craig Dawson iyo  Jonas Olsson dhinaca kale udhigeen waxaana ugu danayn dhibcaha labada kooxood u qaybiyay Origi.

Liverpool ayaa garoonkeeda Anfield ku soo dhawaysay kooxda West Brom, waxayna Reds kulankan ciyaaraysay iyada oo kulankii hore ay guuldaro xanuun badani ka soo gaadhay kooxda Newcastle United, waxayna kulankan doonaysay sidii ay tubta guusha ugu soo laaban lahayd.

Liverpool ayaa soo guulaystay 19 kulan oo ka mid ahaa 25 kulan ee ugu danbeeyay ay kooxda Baggies ku soo dhawaysay gagadeeda Anfield. Si kastaba ha ahaatee, kooxda West Brom ayaa kulankan iskeentay iyada oo qaab ciyaareed fiican kaga jirta kulamada ay martida tahay, waxayna soo wada guulaystay dhamaan afartii kulan ee ugu danbeeyay oo ay marti ahayd, sidaa daraadeed kooxda Klopp ayaa maanta ku haysay iska caabinta wayn ee ka horaysay.

Liverpool (4-3-3): Mignolet; Clyne, Skrtel, Lovren, Moreno; Henderson, Can, Milner; Lallana, Benteke, Coutinho.

Kaydka Liverpool : Bogdan, Toure, Firmono, Lucas, Allen, Origi, Ibe.

West Brom (4-1-4-1): Myhill; Dawson, Mcauley, Olsson, Brunt; Evans; Hardner, Fletcher, Morrison, McClean; Rondon.

Kaydka West Brom: Lindegaard, Chester, Anichebe, Lambert, Berahino, McManaman, Gnabry.

Liverpool ayaa ciyaarta si gaabis ah ku bilaabatay balse waqti dheer kumay qaadan in ay fursado fiican abuurto, waxaana daqiiqadii 9 aad fursad fiican helay Benteke oo balse fursadaas ayaan noqon mid natiijada ciyaarta wax ka badashay, dadaal badan iyo fursad abuuris kadib ayay Reds hogaanka ciyaarta la wareegtay daqiiqadii 21 aad waxaana soo laabashadiisa buuxday ee Liverpool goolku furtay kabtanka Reds ee Jordan Henderson, kaas oo ka faa’iidaystay kubbad uu caawinteeda lahaa Adam Lallana, waxayna ciyaartu noqotay 1:0 ay Liverpool hogaanka kula wareegtay.

Laakiin inkasta oo ay Liverpool sii waday qaab ciyaareedkeeda fiican ayay kooxda West Brom samaysay fursada ay kula timid goolkeeda barbaraha waxaana qalad uu sameeyay goolhaye Mignolet kooxda martida loo ahaa ku ciqaabtay  Craig Dawson kaas oo ciyaarta ku soo celiyay barbaro 1:1 ah.

Liverpool ayaa bilawday in ay markale raadiso goolka ay hogaanka kula wareegi karto, waxaana isku dayo badan sameeyay Coutinho iyo Milner, laakiin dhamaadkii qaybta hore ee ciyaarta ayay West Brom la timid gool iyada oo uu Olsson shabaqa ku soo taabtay kubbad laaga xorta ahayd oo uu soo tuuray Gardner, laakiin caawiya garsooraha ayaa tilmaamay in goolkani uu offside ahaa.

Liverpool ayaa qaybta hore ahayd kooxda ciyaarta maamulaysay iyada oo boosishanka ku haysay boqolkiiba 66% isla markaana 18 jeer isku dayday in ay kubbada ku darbayso goolka West Brom waxayna samaysay 5 bartilmaameed laakiin kooxda West Brom ayaa samaysay saddex darbo oo kaliya, waxaana samaysay hal bartilmaameed oo ay goolka barbaraha kula timid, haddana ciyaarta qaybta hore ayaa ku dhamaatay barbaro 1:1 ah.

Markii layskugu soo laabtay qaybtii danbe ee ciyaarta ayay Liverpool bilawday in markale raadiso goolka guusha ama hogaanka markale kula wareegi karto, waxayna markale la wareegtay kubbad haynta iyo boosishanka balse kooxda West Brom ayaa iyaduna bilawday in ay si isku duubni ah u difaacdaan goolkooda isla markaana ay iska ilaaliyaan halisaha weerarka Reds.

Daqiiqadii 60 aad ayuu Adam Lallana dhinaca midig shaqo fiican ka soo qabtay wuxuuna kubbada ubixiyay Benteke balse xidiga ree Belgium ayaa kubbadan ka faa’iidayn waayay isla markaana dhinaca sare mariyay.Waxaan sidoo kale shaqo fiican weerarka ku soo kordhiyay Clyne oo kubbada fiican ka soo shaqaynayay balse difaaca West Brom ayaa u muuqday kuwo nidaamsan oo halista u soo jeeda.

Markii ay Liverpool jabin kari wayday difaaca West Brom ayuu tababare Klopp kursiga kaydka uga yeedhay da’yarka Jordon Ibe, wuxuuna ciyaarta ka saaray Philippe Coutinho Correia oo dhaawac ka soo laabtay laakiin kooxda West Brom ayaaba hogaaka ciyaarta la wareegtay kadib markii uu Jonas Olsson daqiiqdii 73 aad neefta dib ugu celiyay jamaahiirta Liverpool, wuxuuna goolkan ku dhaliyay kubbad uu caawinteeda lahaa Chris Brunt, waxayna natiijada ciyaartu isku badashay 2:1 ay West Brom markeeda hogaanka ciyaarta ku qabtay.

Dhibaatada Liverpool ayaa sii socotay waxaana daqiiqadii 79 aad ciyaarta dhaawac looga dhex qaaday difaaca Reds ee Dejan Lovren kaas oo awoodi waayay in uu garoonka ka baxo waxayna isku dhaceen Gardner laakiin Klopp ayaan booska Lovern difaac ku soo badalin wuxuuna ciyaarta soo galiyay Divock Okoth Origi maadaama oo kooxdiisa goolka hogaanka looga hayay.

Daqiiqadii 81 aad ayay Liverpool ku dhawaatay in ay goolka barbaraha la timaado kadib markii uu Benteke kubbada fiican siiyay Lallana oo xerada ganaaxa West Brom ku jiray balse goolhayaha West Brom ee Myhill ayaa jawaab fiican sameeyay isaga oo kooxdiisa halistan ka badbaadiyay.

Iyada oo Liverpool ku daashay isku daygeeda madhalayska ahaa ayuu ugu danbayn Divock Origi kooxdiisa udhaliyay goolka barbaraha isaga oo kooxdiisa Reds ka badbaadiyay guuldaro kale oo Anfield ku soo gaadhi lahayd, wuxuuna sidoo kale Divock Origi kooxdiisa uu u horseeday in ay dhibic ka hesho kulan ay inta badan kubbada haystay balse qaab ciyaareed liita oo uu goolhaye Mignolet soo badhigay iyo isku duubnaan dhinaca difaaca West Brom ah ayaa keentay in Reds ay dirqi kaga badbaaday guuldaro, wuxuuna Origi goolkan dhaliyay dhamaadkii ciyaarta, waxayna ciyaartu ku dhamaatay barbaro 2:2 ah.